معتز الفحل
الموسيقار محمد الامين الدنيا من بعدك ما بنقدر نطيقا نرضي نحن بقدر الله ونؤمن به ..قلنا ما ممكن تسافر ..،لو تسافر دون رضانا نشقي نحن ..الدهر كله .. وفارقنا النوار …. كنا نمني النفس ان نغني مع اهل الخرطوم وفي نادي الضباط غربه وشوق ويتمها معاك المبدع القامه الحلنقي كما رسمتموها كلمات وتلحين في زمنكم الجميل …
كنت أمني نفسي بجلسة ونسه معك وسط قفشات حسين شندي بروح الدعابه عنك …ولكن الاوباش الذين غدرو بجمال الخرطوم وحنيه امدرمان وسمو بحري وفيافي الابيض وابتسامة مدني حرمونا حتي من ان نشيعك ونبكيك مع هاشم صديق ونحكي عن الملحمه وذكريات تلك الأيام وكيف كان التكريم لكم وكل محبيك.وكلنا ثقه باننا سنهزم الليل ونفتح شبابيك وشراعات الحب والهوية ويوم بكره يسرع ويخفف ماسينا ويبل شوقنا من تراب شهقة ارضنا البكر . .. دنيتنا كانت بقربك يفرهد كل طائر وكل زول يقرأ في جريدتو وهو ماشي ل القلعه وبدورها ويسرح في عويناتك ترع لؤلؤ وبحار ياقوت ونهمس شوقا لاحباء ما بنقبل منهم كلام زعل ..
كنا نمني ب شوفتك بكره في الموعد ونقول بكل حنين وشوق بحبك وشايلين أملنا وفرحنا لاهلنا ويقولو اهلا خلاص قبلنا ويتم منانا بكل جمال وابداع شعراء نظمو روعة كلمات استطاعت اناملك ان تلحنها وانت تحضن عودك وبصحبت اوركستر هي الأروع في تاريخ موسيقانا انطقوها سحرا وبيانا شكلت وجدان أجيال وتواصلت فكانت
تتعلم من الايام وتتالم للغايب والعذرومعاه ..الّمنا في فقدك يا الباشكاتب عميقا ونذرف الدموع والاهات ولكن نقول الحمدلله ونسأل لك المغفرة والرحمه والصبر لاسرتك وابنائك وكل محبيك اللهم لا اعتراض علي حكمك
١٣ نوفمبر ٢٠٢٣
